Wajumbe watishia kupinga bajeti ya Mwakyembe!

WAZIRI wa Uchukuzi, Dk Harrison Mwakyembe anakabiliwa na mtihani wa kwanza baada ya wajumbe wa Kamati ya Miundombinu kukataa kuipitisha bajeti yake wakitaka maelezo ya bajeti iliyopita kutekelezwa chini ya asilimia 40.

Dk Mwakyembe alipandishwa kutoka Naibu Waziri wa Ujenzi kuwa Waziri wa Uchukuzi katika mabadiliko ya Baraza la Mawaziri, yaliyofanywa na Rais Jakaya Kikwete Mei 4 mwaka huu.

Wizara hiyo mpya inagusa sekta nyeti za miundombinu ya kiuchumi na kijamii ikiwamo usafiri wa anga, reli, bandari, huku bajeti yake ikitajwa kutokidhi mahitaji ya shughuli za wizara.

Taarifa zilizopatikana kutoka ndani ya kamati hiyo zinaeleza katika kikao cha juzi, baadhi ya wajumbe walisema hawawezi kupitisha bajeti hiyo mpaka wapate maelezo kutoka kwa Waziri Mkuu, Mizengo Pinda kuhusu kutokutekelezwa kwa bajeti ya 2011/2012 ili wajue bajeti ijayo itatekelezwa vipi.

Chanzo cha habari ndani ya kamati hiyo kilifafanua kwamba wakati baadhi ya wajumbe akiwamo, Anne Kilango Malecela wakipinga, Mwenyekiti wa Kamati, Peter Serukamba alikuwa akishinikiza ipitishwe na kamati jinsi ilivyo, akisema badala yake wangeenda kuipinga bajeti kuu ya Serikali.

Hata hivyo, licha ya Serukamba kujaribu kutumia nafasi ya kiti chake kushinikiza bajeti hiyo ipitishwe, bado mpango huo uligonga ukuta baada ya Kilango ambaye ni Makamu Mwenyekiti wa kamati hiyo na wenzake kuendelea kupinga.